11kii bishan November oo ku beegnayd
habeen hore, waxa magaalada Hargeysa lagu soo bandhigay buug loogu
magac-daray "MIISAANKA NOLOSHA." Farxad gaar ah ayay ii
lahayd inaan ka qayb-galo bandhigii lagu gardaadinayay buuggaas,
aniga oo weliba nasiib u yeeshay inaan xidhiidhiyo xafladdii
daah-furka buugga.
Buugan waxa qoray Abwaan Maxamed Aw
Cali Cartan "Haldeeq" waa buug uu si buuxda ugu
qaadaa-dhigay dhinacyo kala duwan oo nolosha ah. Buuggu wuxuu ka
kooban yahay saddex cudub. Cutubka koobaad wuxuu qoruhu kaga hadlayaa
Milicsiga Nolosha. Waxa uu soo qaadaanayaa dhawr mawduuc oo cutubkan
la xidhiidha kuwaas oo ay ka mid yihiin; Macallinka nolosha,
wadatshigu waa tiirka nolosha, barbaarintu waa badbaado, marinka
nolosha, bay'addu waa badweyn, hantida iyo hogaanka, cabbirka
nolosha, caddaaladi waa sinnaan, baqal baa nirig dhashay iyo dulmigu
waa dabar-goyn.
Dhammaan qodobada cutubkan ku jiraa
waxa mid kastaa uu leeyahay sharraxaadyo si mug leh u iftiiminaya
nuxurka ay ka hadlayaan. Weliba cutubkani wuxuu diiradda saarayaa
arrimo si biyo-kama-dhibcaan ah u taabaya geeddi-socodka nolosha.
Cutubka labaad waxa uu qoru ugu
magac-daray "Milgaha Nolosha" waxa hoos imanaya dhawr qodob
oo kala ah; Carruurnimadu waa ku caqabad nolosha, casharka
nolosha, love number "5", duullaankii ayaxa, saamiga
saboolka, Booraan hadimo, dayb daalac iyo dayar madoobaad.
Sida oo kale cutubka saddexaad ee
buugga wuxu qoruhu u bixiyey "Weled iyo Waalid." Waxa
cutubkan qodobadiisu yihiin; Dhaqanka Carsaanyada, ubadka iyo
adduunka, habaar waalid, buur iyo guur-doon, furriinku waa firdhiso,
mahadhada nolosha, Hagradaaba Hagran, saxidda aayadaha buugga ku jira
iyo tixraaca buugga.
Guud ahaan buuggu saddexdaa cutub ayuu
ka koooban yahay, waana 213 bog oo loo daabacay cabbirka "A5".
Run ahaantii markii aan guud-mar-akhtis ku sameeyey buuggan Miisaanka
Molosha waxa ii soo baxday inuu yahay hage ama tuse in badan oo dadka
ka mid ah ku jihaynaya jidka toosan ee nolosha. Marna waa baraarujiye
soo bandhigaya caqabado nolosha haysta oo sixitaan u baahan sida in
caddaalad iyo sinnaan la helo.
Buugan uu qoray abwaan Haldeeq wuxuu
jidka u furayaa in lagu dhiirado in qalinka loo qaato sidii wax badan
looga qori lahaa dhibaatooyin kala duwan oo ragaadiyey amma haysta
nolosha dadka Soomaalida. Qoruhu wuxuu daliil ahaan u soo qaadanayaa
aadayo qur'aan ah oo ku saabsan nolosha iyo caddaalada, sheekooyin
iyo suugan. Waxa buuggan ku duugan 25 sheeko oo sheeko weliba
taabanayso laf-dhar nolosha ka mid ah. Waxa ku jira 50 maanso iyo 100
maahmaahood oo si yaabo kala duwan nolosha uga hadlaya.
Isku soo wada xooriyoo, guud ahaan
dadka xiiseeya qoraalka iyo inta jecel wanaaga nolosha waxa aan ku
talin lahaa inay buugan wehel ka dhigtaan.
Cabdishakuur
Xaaji Muxumed Muuse [Heersare]
Oodweynenews.com,
Hargeya Office
http://heersaremuxumed.blogspot.com/
No comments:
Post a Comment