Waxa uu noqday wehel nolosha ila
wadaaga. La'aantii waxa aan dareemaa cidla iyo welwel. Mar wuxuu ii
yahay gaashaan, marna difaace, mar kalena u doode. Culayskiisu waa
wax yar oo fudud laakiin wuxuu ii leeyahay miisaan macnaawiyan ah oo
aan la malayn karin. Wuxuu ii horseedaa hal-abuurnimo, hilaadin,
halabsi iyo soo bandhigista arrimo biyo-kama-dhibcaan ah oo dhadhab
ku hoos libidhsan. Ma jecli inaan u adeegsado handdadaad, hagardaamo,
halis-gelin iyo waxyeelayn kale. Waxaan u adeegsadaa intaas
beddelkooda oo ah wax saxid, wacyigelin, wadaagista fikirrada
wax-ku-oolka u ah geedddi-socodka nolosha.
Wax ba yaanay arartu ila sii durkin'e,
waxa aan ka hadlayaa waa “QALINKA” oo aniga iigu astaysan
dhammaan sifooyinka aan sheegay iyo qaar kale oo qarsoon. Qalinku waa
waxa yar ee aynu aragnay inta uu le'eg yahay haba kala cabbir
duwanaada'e, haddana wuxuu leeyahay awood ilaahay geliyey. Qalinku
wuxuu dhigaal u beddelaa hadalada lagu hadlo. Waa laf-dhabarta
saxeexyada macluumaadka iyo document-yada dadku is-waydaarsanayaan
amma la wadaagayo. Waa sugaha amma saxaha xogaha kaydka ah ee
taariikhda gelaya.
Qofku marka ay da'diisu waynaato wuxuu
u baahdaa tukube ka caawiya xagga socodka, kicitaanka iyo
taageersiga. Tukubahaasi wuxuu u kala baxaa ul xooggan, bud, bakoorad
amma qalabka casriga ah ee dadka waa weyn ka caawiya xagga socodka.
Tukubahaasi wuxuu ka mid noqdaa meertada nololeed ee qofka weyn,
la'aantiina socod ma hawaysto. Sida uu tukubahaasi ugu tallaalan
yahay nolosha qofka weyn ayuu anigana qalinku iigu turqan yahay. Waxa
aan mar kasta jeclahay inuu jeebka iigu jiro, si marka aan wax u
xusuusto ee ay maskaxdayda wax ku soo dhacaan aan markii ba u qoro.
Haddii markaa aan jeebkayga qalin ka waayo waxaan dareemaa niyad-xumo
mug leh, werwer iyo cadho. Waxa aan isku dejiyaa inaan maskaxdayda ku
qoro wixii qorshuhu ahaa inaan qoro.
Inkasta oo aan dareensanahay inaan ka
mid yahay dadka saaxiibka dhaw la ah qalinka, haddana dad kale oo
badani kuma baraarugsana muhiimada biyo-kama-dhibcaanka ee la
saaxiibista qalinku leedahay, iyadoo ku xidhnaanta iyo adegsidaga
joogta ah ee qalinku tahay mid qofka ka dhigaysa inuu halabsado
fursado badan oo qofka si sahal ah u seegi lahaa. Waxa aad marar
badan arkaysaa arday wax baranaysa oo haddana qalin baryaya amma
raad-raadiya. Waxa aad arkaysaa qof meherad xisaabiye ka ah oo qofkii
la xisaabinayay qalin waydiinaya. Waxa qofkaa ka sii daran mid xafiis
fadhiya oo haddana dadkii uu waraaqaaha u saxeexayay qalin
waydiinaya. Dadkani waxay tusaale u yihiin kuwa ku guul-darraystay la
saaxiibista qalinka.
Saaxiibbada aanu shaqo-wadaagta nahay
waxay isugu jaraan qaar neceb inay qalinka adeegsadaan oo
koombuyuutarada uun wax ku qora iyo kuwo haddii jeebkooda ay qalin ka
waayaan si weyn uga xumaada. Tusaalahani wuxuu marqaati u yahay dadka
aab hore u soo sheegay, waxa inoo muuqata inay dadku isugu jiraan
kuwo saaxiib dhaw la ah qalinka iyo kuwo xidhiidhka u jaray oo aan
danayn.
Biya-dhaca qormadu wuxuu yahay,
muddooyinkii danbe waxa aan u fiirsanayay in xilliyadan danbe dad
badani dayaceen ku xidhnaansha iyo la saaxiibista qalinka. Waxaana
mudan marka aad habeenkii seexanayso in aad agtaada qalin iyo buug
dhigato si marka aad hurudo ee wax kugu soo dhacaan inta aad kacto
aad u qorto. Waxaana aan ku soo gabagabaynayaa haddii markasta
jeebkaaga qalin laga helo, waxa aad ka dhigan tahay askari aag dagaal
ku jira oo qorigiisii u cabbaysan yahay. Sidaa awgeed waxa aan ku
talin lahaa in si qaddarin iyo qiimo leh loogu xidhnaado adeegsiga
qalinka, oo yaan lagu beddelin qalabka badan ee casriga ah ee
beryahan danbe la isticmaalo.
Cabdishakuur
Xaaji Muxumed Muuse [Heersare]
No comments:
Post a Comment