Habeenkii
xalay waxa jaamacadda Hargeysa lagu soo bandhigay buug xanbaarsan
geeddi-socodkii nololeed ee odayga Somaliland Xaaji Cabdikariim
Xuseen (Cabdi-waraabe). Buuggan oo ka kooban 277 bog, wuxuu
xanbaarsan yahay todobo geeddi oo siyaabo kala duwan uga hadlaya
waayihii iyo dorarkii nololeed ee xaajigu soo maray.
Waxa
aan halkan idiinku soo gudbinaynaa weedhii aan kaga qayb-galay
buugga:
SAMO-TALIS,
waa buuggii iigu muddada dheeraa ee aan sixitaan amma tifaftir ku
sameeyo. Waxaan ku guda-jiray muddo ku siman laba bilood marka laga
reebo xilliyo waqtigu igu yaraa. Maxaa yeelay, waxa aan sixitaanka
dhinac waday dhugasho, waxbarasho iyo wax korodhsi aan ku dhex
dawaafayay boggagga kala duwan ee buuggani ka kooban yahay.
Buuggan
SAMO-TALIS ee uu qoray Siciid Maxamuud Gahayr, waa buug rumeeyey
himmilo dad badan ka dhex-guuxaysay oo salka ku haysay in mar uun
buug laga qoro ruug-caddaaga Somaliland “Xaaji Cabdikariim
Xuseen-Cabdi Waraabe.” Waa buug xambaarsan waayo-aragnimadii,
shakhsiyaddii, taariikh-nololeedkii, samo-taliskii iyo guud ahaan
geeddi socodkii nololeed ee Xaaji Cabdi Waraabe oo sida buuggan ku
cad noloshiisu illaa 1905-kii kolba marxalad soo maraysay.
Intii
aan sixitaanka ku hawl-lanaa waxaan fursad u helay inaan si buuxda u
barto; waa kuma Xaaji Cabdi Waraabe? Oo aan illaa yaraantaydii aan
maqli jiray. Waxa farxad ah haddii-ba uu Xaaji Cabdi Waraabe
geeriyoodo oo tii ilaahay u timaado inuu ka tegayo buug markhaati cad
ka ah hawl-garnimadiisii iyo halgankiisii uu u soo galay nabadaynta
iyo dhismaha qaranka Jamhuuriyadda Somaliland, xilliyaddii ka
horreeyey iyo mar xalad kasta oo lagu jiray.
Laga
soo bilaabo maalintii uu cafiyey ninkii aabbihii dilay waxa uu noqday
shakhsi ku sifoobay oo go’aan ku gaadhay u ololaynta nabadda,
deminta colaadaha, isu soo dhawaynta bulshada colaaduhu kala
irdheeyeen, la shaqaynta iyo talo-siinta hadba maamulka dawladeed ee
jira.
Inkasta
oo Xaaji Cabdi Waraabe istaahilo/u qalmo in tobannaan buug laga qoro,
haddana kani waxa uu barbilaw fiican u yahay in la weeleeyo
taariikhda mugga weyn ee Xaaji Cabdi Waraabe, oo xambaarsan
waayo-aragnimo nololeed oo qof kasta oo akhriya wax uun u
kordhinaysa.
Qooraaga
buuggan SAMO-TALIS waa Siciid Maxamuud Gahayr’e, waxaan ku
ammaanayaa oo aan uga mahadcelinayaa garashada iyo dadaalka dheer ee
uu u galay inuu buuggan dhaxal-galka ah ka qoro Xaaji Cabdi Waraabe,
oo ka mid ah hal-doorrada Somaliland ku dhaadato. Waa buug ay ku
dheehan tahay farshaxannimo, hal-abuurnimo iyo hoga-tusaalayn muc leh
oo qofku si fudud u dheehan karo.
Waxa
aniga si gaar ah ii taabatay maadaama oo aan ka mid ahaa ardaydii
2012 ka qalinjebisay machadka sare ee xallinta khilaafaadka iyo
nabadda ee jaamacadda Hargeysa sidii wax-ku-oolka ahayd ee Xaaji
Cabdi Waraabe uga soo shaqeeyey xallinta khilaafaadka iyo nabadaynta.
Waxaad la amakagaysaa dadaalladii nafhurnimada ahaa ee uu ku bixiyey
nabbadda, hadallada dhiiran ee uu u soo jeediyo cid kasta isku dayda
inay nabadda waxyeesho, fahamkiisa xeesha-dheer ee ku qotoma
wannaagga nabada iyo xasilloonida.
Cabdishakuur
Xaaji Muxumed Muuse [Heersare]
http://heersaremuxumed.blogspot.com/
No comments:
Post a Comment